Мерейлі спорт мектебі

Мектеп тарихы
Мерейлі спорт мектебі

Мақала авторы: Сералимова Роза Сейілбекқызы
Жұмыс орны: «Қ.Мұңайтпасов атындағы олимпиада резервінің республикалық мамандандырылған мектеп-интернат-колледжі» республикалық мемлекеттік мекеме
Лауазымы: қазақ тілі және әдебиет пәні мұғалімі
Порталға жариялану мерзімі: 09.05.2017


Мерейлі спорт мектебі
Аралап талай жерді, сан қаланы,
Күресіп талай алып, дәуді жыққан.
Ел кезіп, елден асқан палуанның
Талайын қол ұшымен ойнап сыққан.
Сәкен Сейфуллин
Ұрпақ тәрбиесінің ұлы ісіне өмір жолы болар тұлғаларымыз баршылық. Солардың шоғырында Қажы Мұқанның жұлдызы ерекше жарық. Өз ұлтының бойындағы барлық асыл қасиеттерді, ұлттық салт-дәстүрлерді, тілінің бар байлығын шебер игеріп, саналы ғұмырында сақтап өткен асыл азамат әкім-ұлықтардың емес, қарапайым халқының жүрегінде мәңгі орын алды. Ұлттық намысты ту етті, әлсіздік пен пендешілікке бой ұрмады. Артына үлгі болар жақсы өнегесін қалдырды.
Әлемге қазақ деген ел бар екендігін танытып, дүние жүзі халқына еріксіз таңдай қақтырған, небір азуы алты қарыс мемлекеттердің атағы жер жарған саңлақтарын сан соқтырып, жеңіс тұғырына сан мәрте табан тіреген тұңғыш қазақ спортшысы Мұқан бабамыз көтерген туды қазіргі ұрпақ түсірмей көкте желбіретіп келеді. Олай дейтін себебім, осынау Елордамыз Астана қаласының төрінде табан тіреп тұрған қара шаңырақ спорт мектебі осы Қажы Мұқан бабамыздың атында.
Қазақта «Атына заты сай» деген сөз бар. Атаулы мектеп – келешек олимпиада чемпиондарын даярлап баптайтын, темір болаттан соққандай етіп соғатын ұстаханасы деуге де болады. Біздің мектеп олимпиада резервін жастайынан баптайтын республикалық мамандандырылған спорт мектеп-интернат-колледжі.
Тарихқа көз жүгіртетін болсақ, Қажы Мұқан Мұңайтпасов атындағы спортта дарынды балаларға арналған республикалық мектеп-интернаты 1971 жылы құрылды. 1971-1972 оқу жылын мектеп-интернатының алғашқы 58 түлегі бітірген. 1971-2016 жылдар аралығында мектепті 3642 түлек аяқтап, қазіргі таңда Қазақстан Республикасының көк туын желбіретіп, үлкен додаларда өздерін көрсетіп жүр. Сонымен қатар олар спорт және басқа салаларда да қызмет етуде.
Біздің мектебіміздің Қажы Мұқан Мұңайтпасовтың атымен аталуының өзі үлкен міндет арттыратыны сөзсіз. Еліміздегі жүріп жатқан саясат, түрлі реформалар ХХІ ғасырда біздің елімізді әлемдегі 30 ең дамыған елдердің қатарына қосу бағытында болса, соған жеткізер бір-де бір құрал осы спорт болса керек. Өйткені спортты дамыту арқылы ұлттың сау болуына қол жеткіземіз. Спорт жетістіктері арқылы әлемге әйгілі боламыз. Өнер мен спортта шек жоқ, спорт арқылы біздің елімізді таниды. Ал осындай танымал болу оңайлықпен келмейді, ол үшін талай тер төгу қажет.
Осыншама уақыт ішінде мектеп өзінің тамаша түлектерін, республика бойынша спортта дарынды Қажы Мұқан ізбасарларын тәрбиелеп, әлемдік тұғырға көтеріп келеді. Ал осы сөзіміздің дәлелі ретінде әр түрлі кезеңде мектеп-интернатынан түлеп ұшқан спортшыларымыздың бағындырған белестеріне тоқталып өтетін болсақ, олар: еліміздің түрлі чемпионаттарынан бастап, Әлем, Азия чемпиондары, қала берді тіпті Олимпиада ойындарының жүлдегері. Аты аңызға айналған, Қазақстан спортына еңбегі сіңген даңқты спортшылары: Шәміл Серіков, Ольга Кривошеева, Виктор Шашерин, Дәулет Тұрлыханов, Валерий Тихоненко, Елена Чебукина, Мәулен Мамыров, Ислам Байрамуков, Ермахан Ыбрайымов, Нұрбақыт Теңізбаев, Елдос Сметов т.б. Бұл тізімді жалғастыра беруге болады, өйткені бұл ұстаханада отта балқып, өз кезегін күтіп тұрған болаттар көпшілік.
Аталмыш жыл Қазақстан Республикасының Мәдениет және Спорт министрлігі спорт және дене шынықтыру істері комитетінің «Қажымұқан Мұңайтпасов атындағы олимпиада резервінің республикалық мамандандырылған мектеп-интернат-колледжі» Республикалық Мемелекеттік Мекемесі үшін мерейлі жыл болып отыр. Себебі биыл мектеп өзінің 45 жылдығын атап өтпекші.
Мектептің қазіргі ісін айтсақ, өзінің жарты ғасырға жақын қызметінде мемлекеттік тұрғыда жас спортшыларға барлық жағдай жасалуда. Бүгінгі таңда спорттың он сегіз түрінен жаттығып дайындалуға мүмкіндік бар. Сонымен қатар, біздің түлектеріміз білім жағынан да жалпыға білім беретін мектеп оқушыларымен білім таластырып, мектебімізді үздік және жақсы аяқтап жоғарғы оқу орындарына түсуде. Осы жаттығу мен білімді қатар алып жүрген жас түлектеріміздің өсіп-өніп жетілулеріне мектебімізде жасалатын жағдайлар туралы айтатын болсақ, сынып кабинеттері жаңа дәуірге сай технологиялармен жабдықталған, сабақ интербелсенді тақтаның көмегімен, ғаламтор арқылы қашықтықтан, электрондық оқулықтар арқылы жүргізілетіндіктен жарыста немесе оқу-жаттығуда жүрген спортшылармен әрдайым байланыс жасалып отырады. Ұстаздарымыздың 70% пайызынан асқаны — жоғары санатты өз ісін жетік білетін жандар.
Осы қаршадай жасынан жырақта жүріп, спорт арқылы Қазақстанның туын көкке желбіретемін деп жүрген жас түлектеріміз үшін әке орнына әке, шеше орнына шеше болып жүрген тәрбиешілеріміз бен сүйегі сырқыраса қасынан табылатын ақ халатты медициналық қызметкерлердің де еңбектері зор.
«Ас – адамның арқауы» демекші олардың жаттықтыру, жарыс барысында нәтижеге жетуіне және шаршаған ағзаларын қалыпқа келтірудегі асхана қызметкерлерінің де үлесін айтпай кету мүмкін емес.
Ал бәйгеге шабатын тұлпарды баптайтын, мектеп-интернат-колледж оқушыларымен жаттығу жүргізетін 70-тен астам біліктілігі жоғары дәрежедегі жоғары санатты, Халықаралық дәрежедегі спорт шеберлігі, ҚР еңбек сіңірген жаттықтырушы атағы бар жаттықтырушылар қызметін ерекше атау орынды болар. Әрине, қажымай еткен еңбектің жемісі болары сөзсіз, сондықтан біздің мектебіміздің түлектері әлі талай әлем додаларында көк туымызды көкте желбіретіп, Әнұранымызды асқақтатады деген сенімдеміз.
Осы барлық мақтан тұтар жетістіктеріміздің ішінде биылғы оқу жылының басында, Білім күні қарсаңында Қажы Мұқан бабамыздың 145 жылдығына арналған асқақ мүсіні мен мектебміздің даңты спортшылары және үздік түлектеріне арналып жасалған мектеп алдындағы аллеяны айтуға болар. Қазіргі таңда аллея тақтасында олимпиада жеңімпаздары мен үздік оқушылардың саны тең болмаса да, болашақта бұл тақта жарыса толықтырылатынына кәміл сенеміз.
Ойымды қорыта келе мақаламды атағы жер жарған Қажы Мұқан бабамызға Тұманбай ағамыздың арнаған мына бір өлең жолдарымен аяқтап,
Талай-талай мықтымен тайталасып,
Ұрпағы оның ерлігін қайталасын.
Қажы Мұқандай ұл туған қазағымды,
Күштен кем деп қалайша айта аласың,
дей отырып, осындай ұл туған қазағымның жолын ардайым ашық қылсын демекпін!

Конкурстар мен олимпиадалар - https://talimger.kz

Республикалық қашықтық олимпиадалар — http://clever.zti.kz

Республикалық конкурстар, курстар, конференциялар мен олимпиадалар — https://ukz.kz

Конкурстар, конференциялар және олимпиадалар — https://tarim.kz

Халықаралық семинарлар, олимпиадалар мен конкурстар — https://mriks.ru

Халықаралық педагогтар ассоциациясы - https://iae.su

Атаулы ертегілер - https://hansunqar.kz